Sustegn per la realisaziun da cooperativas da habitar

Per puder garantir spazzia da viver ad indigens ch'ei finanzialmein suportabels ed atractivs, eis ei evident che las autoritads localas, regiunalas e cantunalas promovan e sustegnan activamein la realisaziun da cooperativas da habitar en Surselva. Quei munta che las autoritads lantschan agens projects da cooperativas da habitar sin teren communal e ch'ellas sustegnan medemamein era projects da cooperativas privats cun lur expertisa e finanzas. Quei ei la suletta via per puder evitar ch'il marcau d'immobilas en Surselva explodescha sco ell'Engiadina, nua ch'igl ei quasi nunpusseivel per indigens d'anflar in suttetg en lur patria. La situaziun cullas habitaziuns secundaras e la pandemia da Covid-19 han aunc ina gada dau in stausch a quei trend marsch ch'exista gia dapi biars onns. Era il cusseglier naziunal, Martin Candinas da Rabius, ha constatau en ina debatta dalla televisiun romontscha davart la tematica che la realisaziun da cooperativas da habitar seigi in uaffen impurtont per puder dar cunterpeisa alla situaziun actuala ch'ei bravamein ord ballontscha.  https://www.rtr.ch/play/tv/controvers/video/segundas-abitaziuns---10-onns-suenter-la-votaziun?urn=urn:rtr:video:ece7d2cb-1ca0-4aab-8d93-91455cceabac

Ei drova dus, treis projects da piunier che muossan allas persunas responsablas mo era alla populaziun dalla regiun che cooperativas da habitar ein ina alternativa raschuneivla. Quei instrument festivescha dapi entschins onns ina gronda renaschientscha els marcaus dalla bassa, nua ch'el vegn promovius activamein e cun success dalla politica locala. Igl ei neras uras ch'era la periferia seglia sin quei tren ed ughegia d'ir vias novas ella planisaziun dil spazzi.